Do poprawnego działania strony wymagane jest włącznenie obsługi javascript. Zmień to w opcjach Twojej przeglądarki i odśwież stronę.
Òrmùzdowô Skra 2018
środa, 27 lutego 2019
Nie znaleziono zdjecia
fot. Sławomir Lewandowski

Wczora wieczór w gduńsczi Stôrogardowi Radnicë bëła ùroczëzna dôwaniô laùreatóm Òrmùzdowëch Skrów 2018 diplomów, sztaturków Remùsa a kwiatów, a téż wrãczenié Stipendium miona Izabellë Trojanowsczi na rok 2019.


Zéńdzenié zaczãło sã òd wëjimkù z romana Aleksandra Majkòwsczégò "Żëcé i przigòdë Remùsa", z jaczégò ùdbòdôwca wëprzédnieniów, wielelatny przédny redaktór cządnika "Pomerania" Wòjcech Czedrowsczi, wzął nazwã i symbòlikã nôdgrodë. Pòtemù prowadzący pòtkanié Karolëna Serkòwskô i Andris Bùsler prosëlë (za régą) na binã wëprzédnionëch, jaczi sôdelë na hònorowëch placach i słëchelë wëchwałów swòji bëlny robòtë dlô Pòmòrsczi - dlô Kaszëbsczi i dlô Kòcewiô. Laùdacjã Kazmierza Jaruszewsczégò z Chònic, napisóną przez Bògdana Kùffla, czëtôł Dark Majkòwsczi. Daniela Kalinowsczégò - słowama Rómana Drzéżdżona - prezentowôł Andris Bùsler, Damrokã Kwidzyńską - Bògùmiła Cërockô, a Iwónã Kwidzyńską - Ana Cupa-Dzemińskô. Pózni Skrã mieszkającą w Tczewie, widzało rozszérzwiającą kòcewską kùltura, tj. Eleonorã Lewandowską, wëchwôlôł Bògdón Wisniewsczi. A pò tim wrócëlë më na Kaszëbë - ò Januszu Mamelsczim długò i piãkno gôda Wanda Lew-Czedrowskô, a jesz jegò wiérztkã-łómôczkã jãzëka kùńsztowno przeczëta Karolëna Serkòwskô. Jakno slédny za régą alfabeticzną òstôł widzało przedstawiony prof. Duszan Pażdżersczi, chtëren wiele robi dlô kaszëbiznë nié blós na Pòmòrzim, ale i za grańcama Pòlsczi - ò nim gôdôł Dark Majkòwsczi. Pò kòżdi laùdacje wëchwôlony abò wëchwôlonô dostôwelë diplóm, drzewianégò Remùsa a téż krutã kwiatów.

fot. Sławomir Lewandowski


Pò pòdzãkòwaniach òd laùreatów i mòwie prof. Édmùnda Wittbrodta, przédnika KPZ, bëło wrãczoné Stipendium miona Izabellë Trojanowsczi. W miono kapitułë stipendium ò nim i jegò zasłużony dlô Kaszëb a Kaszëbów patronce gôda a diplóm Aleksandrze Dzãcelsczi-Jasnoch dôwa redaktór Éwa Górskô. Dëtczi przekôzôł sóm przédnik Zrzeszeniô, chtërno òd czile lat je jegò donatorã. A pòtemù piãkną a skrëszającą przëmòwã miała stipendistka z Czerska...

fot. Sławomir Lewandowski

 

Na kùńc snôżi minikòncert w pòstacje trzech spiéwów dała Òrmùzdowô Skra 2018 Damroka - wëkònała snôżi i mało znóny (a żôl!) dokôz Jana Trepczika "Tatczëzna", chtëren pierszi rôz spiéwa jakno jednôscelatné dzéwczã, i z wiôldżim szwóngã a bluesowò-jazzëjącą mòcą, dwa kòwerë kaszëbsczich hitów, przërëchtowóné kòl kùńca ùszłégò wiekù w chëczë pòmòrańców w Łątczińsczi Hëce: "Kaszëbsczich jezór" (ks. Antona Peplińsczégò) i "Kaszëbsczich nót". Wëstąpiła z drëszkama, arcybëlnyma mùzykańtkama: Amelią Pãkałą (pòl. Pękała) - klawir, i Małgòrzatą Krëszińską (Kruszyńska) - kóntrabas.

fot. Sławomir Lewandowski


Bogumiła Cirocka

 

 

Galeria zdjęć

NAJNOWSZE ARTYKUŁY
© Copyright 2005 - 2019 Portal Regionalny kaszubi.pl
Wydawnictwo Zrzeszenia Kaszubsko-Pomorskiego
Projekt graficzny: Iselin
Webmaster: Łukasz Makurat
Strona korzysta z plików cookies w celu realizacji usług i zgodnie z Polityką Prywatności. Możesz określić warunki przechowywania lub dostępu do plików cookies w Twojej przeglądarce. Kliknij na to powiadomienie, aby je zamknąć.